الشعب يريد إنهاء الماتش

بسم الله الرحمن الرحيم

الوحدة الخامسة والعشرين والمخرج شباب الفيس بوك
وهذه تحياتي محدثكم
شيكالدينو ينقل لحضراتكم المباراة الهامة والمرتقبة
بين منتخبي الفاسدين و اللي أفسد منهم
نبدأ بتشكيل الفريقين
يمثل منتخب الفاسدين اليوم
في حراسة المرمي حسني تبارك .... حامي حمي الفاسدين
أربعة في خط الدفاع بطرس مالي وزهير جمانه وأمجد الفقي والمدفعجي أحمد نظير
في خط النص أربعه متكتكين عالأخر من اليمين رشيد المستخبي وفي الشمال أيمن المغربي
وإثنين محور إرتكاز أمير أباظه والمايسترو عاطف عنيد وفي الأمام صانع الألعاب
ممدوح فرعي ومهاجم وحيد هو بعبع الملاعب خبيث العادلي

أما منتخب اللي أفسد منهم فبيمثله النهارده في حراسة المرمي
كمال مبارك أمامه أربعه في خط الدفاع علي الدين هلات ومحمد أبو الفتحتين
وحسين سالك والمخضرم ذكريا أبو العزايم
أربعة في خط النص من اليمين فاروق حستي وفي الشمال سامي فهمي
إثنين محاور إرتكاز فتحي شرور والأسطورة مفيد حساب
أمامهم صانع الألعاب صفوت الحريف وفي المقدمة أحمد أبو حديد

منتخب الفاسدين النهارده لابس الفانله السوده والشورت الأغبر
أما منتخب اللي أفسد منهم فبالفانلة المنيلة والشورت اللي أنيل

يحكم لقاء اليوم طاقم عربي ... حكم الساحه الليبي مدمر القذافي والشهرة
محمر الكنتاكي وحكم رايه أول اليمني عبدالله طالح وحكم رايه ثاني السوري فشار الأسد
وحكم رابع هو المصري عبد المجيد عمود النائم العام

ولو انت قاعد في مقصورة ميدان التحرير هتلاقي منتخب الفاسدين علي شمالك
ومنتخب اللي أفسد منهم علي شمالك برضه وربنا يجعلهم من أهل الشمال

ونستمع الآن للنشيد البطني لمنتخب الفاسدين
فسادي فسادي فساااااااااادي.......... لك جيبي واجتهااااااادي
مصر يا أرض الفسااااااد ....... أنت غايتي والمراد
وعلي كل الفساد ..... كم لصوصك والأيادي
هييييييييييييييييييييييييييييييييييييييييه

والأن نشيد منتخب اللي أفسد منهم
ما شفش الرجال ....... الحراميه الشداد ...... ولا كل المحن
ولا شاف الفساد ..... في عيون العباد ..... وتحدي الزمن
ولا شاف دمار ..... في عيون البشر
بيقولوا حرام ....... مش عاوزين نتعصر
أصله عايش في القصر .... أصله عايش في القصر
هييييييييييييييييييييييييييييييييييييييييييييه

ودلوقت انا شايف الحكم الليبي بيظبط عمته وبيبص في ساعته
ويطلق الحكم صافرة البدايه والكره مع فريق الفاسدين توصل في اليمين
لأباظه ويرجع وره لنظير ونظير يلعب للفقي اللي بيشوط قدام
للمايسترو عطوفه ... يا سيدي يا سيدي ايه الفساد ده يا ابني ويلعب قدام
للمنفرد بالشعب قصدي الشبكة خبيث ويشوط قنبله ... يا ولد يا ولد يا ولد
ايه يا بني ده .... لسه فيه حلاوة كده .... لسه فيه فساد كده
ايه يا عم خبيث ده ......... ايه اللي انت عملته ده
راسك بتشوط قنابل ورجلك بتلقح صواريخ
يا جماله يا جماله يا جماله ....... بشماله الخبيث حطهاله
وهاتها من المشرحه قصدي الشبكة يا ابني
واحد ... صفر

وعلطول يسنتر منتخب اللي أفسد منهم .... والكورة مع مفيد حساب
يديها لصفوت ... وماشي صفوت ويسرق قصدي يمرقص الأول والثاني والثالث
ويمرر للقصير المكير أبو حديد .... وماشي وهيشوط هيشوط
وجوووووووووووووووووووووووووووول
تمريرة علي أحسن ما يكون ......... وتصويبه علي أفضل ما تكون
والفساد قصدي الهدف علي أحلي ما يكون
بص شوف الكورة راحت فين ...... الكورة لزقت في المقص
زي السيخ ما لزق في الصبة بالظبط

يا عيني يا عيني يا عيني .. المبارة نار يا جماعة والفساد شكله كتير النهارده
واحد ... واحد

^^^^
^^^
^^
^

وتسمتر المباراة 90 شهر ثم يلعب شوطين إضافيين مدة كل شوط 15 شهر
ولكن تتعادل النتيجه في النهايه وكانت 39مليون .... 39مليون
ليحتكم الفريقان إلي مباراة علي أرض
منتخب اللي أفسد منهم لتستمر 90 شهر ثم شوطين إضافيين مدة كل شوط 15 شهر
ورغم هذا يحدث تعادل ولكن هذه المره 53 مليون .... 53 مليون
ليحتكما إلي مباراة فاصلة علي أرض محايدة , وأيضا تلعب 90 شهر
ثم شوطين إضافيين مدة كل شوط 15 شهر
وكان الوقت الضايع في كل مباراة 4 أيام ومع كل هذا تتعادل النتيجه
لكن بنتيجه أعلي وهي 3 تريليون .... 3 تريليون

ولو حسبنا الشهور اللي اتلعبت هنلاقيهم
360 شهر يعني 30 سنة لغاية ما الشعب أراد إنهاء الماتش
وبالتالي الفساد فقال كلمته يوم 25 يناير 2011
الشعب يريد إسقاط النظام
وأنا أقول .. الشعب يريد إنهاء الماتش

دمتم بخير وحفظكم الله وحفظ مصر وشعبها
والسلام عليكم ورحمة الله وبركاته

الله عليك يا شيكالدينيو
ايه المباراه المثيره دى
كان نفسنا ننهى الماتش ده من زمان
حتى التليفزيون المصرى ما اذاعهوش واخدته الجزيره حصرى واحيانا بمشاركة العربيه

شيكالدينيو العزيز

فعلاً انرت المنتدى بتعليقاتك وكلماتك الجميلة وافتقدناك فترة طويلة ولو نعرف ان الثورة ستعيدك كنا عملناها من زمان عموما مرحبا بك والى المزيد

تسلم يا استاذ شيكالدينيو

منور الدنيا كلها ومبروك للزمالك

تقبل تحياتى

تسلم يا شيكا

نورت الترفيهى ياعمنا

والشعب يرديد شيكا على طول ميغبشى

طلتك هنا اسعدت حالنا

تقبل تصفيقى للتعادل لمدة 30 سنة

مشكووووووووور للجميع

سمير عبد المحسن /
وحشتنا جدا والله والكل بيسلم عليك وبيقولولك الدراعات فين ؟
ههههههههههههههههه

أ/ محمد المشد
الكلام يعجز عن الشكر ولا أقول سوي
جزاكم الله خيرا

أبو زياد الغالي
شكرا يا جميل بس زياد منور والله ما شاء الله
وبعدين هو ناسيك يا عم ..... سلامي للجميع

عمنا أ/ عبد السلام
الترفيهي منور بصحابه
والكبير كبير... جزاكم الله خيرا

شكرا لكم جدا
والسلام ختام